Andy Slavitt, aðalráðgjafi ríkisstjórnarinnar um heimsfaraldurinn, skýrði frá þessu á Twitter. Hann skrifaði að bóluefnin verði gefin „þegar þau eru tiltæk“. „Til allra þeirra sem skiljanlega segja: „Kominn tími til“ eða „eftir hverju var verið að bíða“ þá er mjög lítið magn tiltækt núna og af þeim sökum erum við ekki að tapa neinum tíma,“ skrifaði hann einnig en skýrði ekki nánar frá hvað þurfi til til að skammtarnir verði tiltækir.
Fulltrúar Hvíta hússins segja að Bandaríska lyfjastofnunin, FDA, verði að staðfesta að bóluefnið uppfylli þær gæðakröfur sem gerðar eru áður en það verður sent úr landi. AP segir að bóluefnið verði gefið öðrum löndum á næstu mánuðum þegar búið verður að staðfesta gæði þess.
Jeff Ziens, talsmaður Hvíta hússins, sagði að um 10 milljónir skammta fái fljótlega gæðavottun og verði sendir úr landi. 50 milljónir skammta séu á „mismunandi framleiðslustigum“ og verði væntanlega sendir úr landi í maí og júní.
Ekki var skýrt frá hvaða lönd fá bóluefnið. Talsmenn Hvíta hússins segja að Bandaríkin hafi ekki þörf fyrir bóluefnið frá AstraZeneca á næstu mánuðum og því verði það gefið. Ekkert hefur verið notað af bóluefni AstraZeneca í Bandaríkjunum því það hefur ekki enn fengið markaðsleyfi hjá FDA. Bóluefnin frá Moderna, Pfizer/BioNTech og Johnson & Johnson eru notuð.
