Franska þingið samþykkti nýlega bann við flugi á stuttum flugleiðum innanlands ef hægt er að ferðast sömu leið með járnbrautarlestum á innan við tveimur og hálfri klukkustund. Bannið nær ekki til tengiflugs. Markmiðið með lögunum er að draga úr losun gróðurhúsalofttegunda.

Afgreiðslu málsins er þó ekki endanlega lokið og á efri deild þingsins eftir að fjalla frekar um það að sögn BBC.

Bannið mun væntanlega hafa áhrif á flug á milli Parísar og borga á borð við Nantes, Lyon og Bordeaux.

Upphaflega ætlaði ríkisstjórnin að ganga enn lengra og miða við fjögurra klukkustunda ferð í lestum en lét af þeim fyrirætlunum eftir mótmæli frá sumum héruðum landsins og flugfélaginu Air France-KLM.

Frönsku neytendasamtökin UFC-Que Choisir hvöttu ríkisstjórnina til að halda sig við fjögurra klukkustunda viðmiðið og bentu á að að jafnaði losi flugvélar 77 sinnum meira CO2 út í andrúmsloftið á hvern farþega en járnbrautarlestir.