Vísindamenn við Oxfordháskóla og hjá lyfjafyrirtækinu AstraZeneca hafa gert tímabundið hlé á tilraunum á börnum með bóluefni AstraZeneca gegn kórónuveirunni. Beðið er eftir upplýsingum frá Evrópsku lyfjastofnuninni EMA áður en ákvörðun verður tekin um framhaldið.

Sky News skýrir frá þessu og hefur eftir talsmanni háskólans en vísindamenn við hann þróuðu bóluefnið í samstarfi við vísindamenn hjá AstraZeneca. Tilraunir hafa staðið yfir með bólusetningar á breskum börnum að undanförnu. Talsmaðurinn sagði að „engar áhyggjur“ væru uppi um öryggið í rannsókninni.

EMA er að rannsaka hvort tengsl séu á milli bóluefnisins og blóðtappa hjá fólki en nokkrir hafa látist eftir að hafa verið bólusettir með bóluefni AstraZeneca.

Oxfordháskóli tilkynnti í febrúar að tilraunir myndu hefjast í febrúar á 300 börnum sem myndu fá bóluefnið. En nú hefur hlé verið gert á þessum tilraunum á meðan beðið er eftir frekari upplýsingum frá EMA.

Ekki hefur verið sýnt fram á bein tengsl á milli bóluefnisins og blóðtappa en í gær sagði yfirmaður hjá EMA að tengsl væru þar á milli. Stofnunin dró í land í gærkvöldi og sagði að enn hefði ekkert verið staðfest í þeim efnum og að málið væri enn í rannsókn. Reiknað er með að EMA sendi frá sér tilkynningu í dag eða á morgun.