Foreldrar, barna í skólanum, fréttum fljótt af þessu og mótmæli hófust í kjölfarið. Múslimar og prédikarar úr mosku í bænum auk nokkurra foreldra hafa haft sig mest í frammi í mótmælunum og krefjast þess að kennaranum verði vikið úr starfi.
„Við verðum að standa upp og sýna þeim, skólastjóranum, skólanum og yfirvöldum, að þetta er ekki eitthvað sem er hægt að taka vægt á. Það er lína sem má ekki fara yfir,“ sagði einn mótmælendanna, „Abdullah“, í samtali við BBC.
BBC Radio Leeds hafði eftir foreldri eins nemandans að henni þætt leitt að myndin hefði verið notuð í kennslu en að hún styðji ekki mótmælin því henni finnist þau „óhugnanleg og ógnandi“.
Kennarinn sýndi myndina í upphafi síðustu viku og varaði nemendur við að hér væri um umdeilda mynd að ræða. Síðar um daginn fór fréttin um málið eins og eldur í sinu um samfélagsmiðla og nafn kennarans var birt. Honum bárust í kjölfarið morðhótanir og nú er hann í felum af ótta um líf sitt. Honum hefur að auki verið vikið tímabundið úr starfi af skólastjóranum sem hefur beðist afsökunar á málinu og sett rannsókn af stað. Afsökunarbeiðnin var lesin upphátt fyrir þá sem mættu við skólann á fimmtudaginn en í henni kom einnig fram að mikilvægt sé að börn læri um andleg málefni og trúarbrögð en það verði að gerast á viðeigandi hátt. Þetta dugði ekki til að lægja öldurnar og mótmælendur, sem krefjast þess að kennarinn verði að minnsta kosti rekinn, lokuðu fyrir aðgang að skólanum á fimmtudag og föstudag og varð því að grípa til fjarkennslu.
Tæplega helmingur íbúa Batley eru múslimar og málið hefur vakið mikla reiði í samfélagi þeirra. Málið hefur einnig ratað inn á borð bresku ríkisstjórnarinnar. Gavin Williamson, menntamálaráðherra, hvatti skólastjórnendur til að ræða málin við kennara og nemendur en sagði um leið að mótmæli, eins og verið hafa, þar sem morðhótanir og brot á sóttvarnareglum eiga sér stað séu óásættanleg og verði að stöðva. „Skólum er heimilt að nota allt hugsanlegt efni, hugmyndir og annað í kennslu sinni, einnig það sem er umdeilt,“ sagði hann.
