Það eru 2,6 sinnum meiri líkur á að fólk þurfi að leggjast inn á sjúkrahús ef það smitast af breska afbrigði kórónuveirunnar, B117 afbrigðinu, en ef það smitast af upprunalegu veirunni. Þetta eru niðurstöður nýrrar rannsóknar norska landlæknisembættisins, FHI.

Norska ríkisútvarpið skýrir frá þessu. Vitað var að breska afbrigðið er meira smitandi en upprunalega veiran og hefur breska afbrigðið víða náð yfirtökunum í faraldrinum, til dæmis í Noregi og Danmörku.

Line Vold, deildarstjóri hjá FHI, sagði að fólk, sem er smitað af breska afbrigðinu, sé 2,6 sinnum líklegra til að þurfa að leggjast inn á sjúkrahús vegna COVID-19 veikinda. Norska rannsóknin sýnir einnig að breska afbrigðið getur valdið alvarlegum veikindum hjá fólki yngra en 40 ára.

„Hættan er enn lítil í yngstu aldurshópunum en eykst nokkuð frá tvítugu og upp úr. Við höfum það mikið af gögnum um það að við getum ályktað það,“ sagði Vold.

Í byrjun mars voru rúmlega 70% allra smita í Noregi af völdum breska afbrigðisins en það uppgötvaðist fyrst í Bretlandi í september. Almennt eru sérfræðingar sammála um að afbrigðið sé mun meira smitandi en upphaflega veiran.