BBC segir að samkvæmt því sem fram kemur í nýrri skýrslu frá Fiocruz rannsóknarstofnuninni þá séu rúmlega 80% gjörgæslurýma í höfuðborgum 25 ríkja landsins nú þegar full en ríkin eru 27. Í 15 af stærstu borgum landsins eru að minnsta kosti 90% af gjörgæslurýmunum upptekin. Í Porto Alegre og Campo Grande eru öll gjörgæslurými full og gott betur en það.
Í skýrslunni varar Fiocruz við of miklu álagi og jafnvel hruni heilbrigðiskerfisins. Skýrsluhöfundar leggja áherslu á að nauðsynlegt sé að grípa til sóttvarnaaðgerða á borð við að fólk stundi félagsforðun og noti andlitsgrímur.
Alls hafa rúmlega 168.000 látist af völdum COVID-19 í Brasilíu en aðeins í Bandaríkjunum hafa fleiri látist eða rúmlega 500.000. Ef dánartíðnin er reiknuð út frá íbúafjölda er Brasilía í 25. sæti eftir því sem kemur fram á worldometers.info. Meðal þeirra ríkja sem eru ofar en Brasilía á þeim lista eru Svíþjóð, Bretland, Bandaríkin og Frakkland.
Í síðustu viku var skýrt frá því að neyðarteymi ríkisstjórnarinnar reiknar með að dagleg dauðsföll af völdum COVID-19 verði orðin um 3.000 fljótlega ef ekki verður gripið til aðgerða. Talið er að yfirstandandi bylgja veirunnar í landinu sé verri en ella vegna P.1 afbrigðisins, oft nefnt brasilíska afbrigðið, sem er talið meira smitandi en önnur afbrigði og virðist eiga auðveldara með að smita fólk sem hefur áður smitast af veirunni.
Jair Bolsonaro, forseti, hefur hvað eftir annað gert lítið úr þeirri hættu sem veiran veldur og nýlega bað hann landsmenn um að hætta að „kvarta“. Hann hefur einnig sagt að faraldurinn sé bara eins og „smávægileg inflúensa“.
