EuroStar rekur háhraðalestir sem þjóta á milli fyrrnefndra stórborga og Amsterdam að auki. En svo gæti farið að fyrirtækið, sem hóf starfsemi 1994, leggi fljótlega upp laupana.
Frá því að heimsfaraldurinn skall á síðasta vor hefur fyrirtækið misst 95% viðskiptavina sinna. Núna eru aðeins farnar tvær ferðir á dag undir Ermarsund en í venjulegu árferði fer ein lest á hverjum klukkutíma. The Times segir að þær lestir, sem fara nú um göngin, séu oft nær tómar. „Hörmungar eru raunhæfur möguleiki,“ hefur Jacques Damas, forstjóri EuroStar, sagt við nokkra breska fjölmiðla. Ef fyrirtækið fær ekki meira fé eða ef samdrátturinn af völdum heimsfaraldursins snýst ekki við gæti saga fyrirtækisins endað í vor.
EuroStar er með höfuðstöðvar í Lundúnum og vill gjarnan fá ríkisstuðning eins og flugfélög og járnbrautarfyrirtæki í Bretlandi hafa fengið. Fyrirtækið bendir á að lestir séu umhverfisvænni en flugvélar og að það haldi uppi einu lestarsamgöngunum við hinar stórborgirnar frá Bretlandi.
Þegar fyrirtækið tók til starfa 1994 var það í eigu ríkisrekinna breskra, franskra og belgískra lestrarfélaga. Fyrir sex árum seldu Bretar 40% hlut sinn til einkafjárfesta og því á breska ríkið ekkert í félaginu lengur. Það eru fjárfestar og frönsku og belgísku lestrarfélögin sem eiga það. Eigendurnir hafa látið fyrirtækinu sem svarar til um 33 milljarða íslenskra króna í té að undanförnu til að halda því gangandi og að auki hefur fyrirtækið tekið lán upp á sem svarar til um 64 milljarða íslenskra króna.
En breska ríkisstjórnin er ekki á þeim buxunum að veita fé til fyrirtækisins og spyr af hverju breskir skattgreiðendur eigi að láta fyrirtækið fá sem svarar til um 16 milljarða íslenskra króna, eins og EuroStar vill, þegar það er í eigu annarra ríkja og fjárfesta.
