Þetta sagði R. Couri Hay, rithöfundur og náinn vinur Melania, í samtali við The Times. Hann sagði að hún muni nú draga sig í hlé, að minnsta kosti um stundarsakir. „Melania hverfur. Það verða engar færslur á Instagram eða Twitter. Þú munt ekki sjá hana,“ sagði hann.
Hann sagði að hún muni nú einbeita sér að uppeldi sonar síns, Barron Trump sem er 14 ára, í Flórída. Hún hafi sjálf afrekað það sem hún vildi afreka í lífinu.
„Melania er ekki pólitískur aðgerðasinni. Hún er frekar félagslegur aðgerðasinni. Þegar hún giftist Donald Trump náði hún toppnum,“ sagði hann.
Orðrómar hafa verið um að Melania og Donald hyggist skilja en Hay sagðist ekki telja það eiga við rök að styðjast. „Það er bara kjaftæði,“ sagði hann.
