Hann dró upp þá mynd að í forsetakosningunum í nóvember standi bandaríska þjóðin frammi fyrir vali á milli tveggja framtíðarsýna, tveggja flokka, tveggja manna og það kom skýrt fram hvað er undir.
„Þessar kosningar munu skera úr um hvort við björgum „ameríska draumnum“ eða leyfum hugmyndum sósíalista að eyðileggja þau örlög sem við metum svo mikils,“
sagði Trump í ræðu sinni.
Á þessum síðasta degi landsfundar flokksins kom skýrt fram að Trump er leiðtogi hans, leiðtogi sem vill halda uppi lögum og reglu. Hann ræddi meðal annars um óeirðirnar í Kenosha í Wisconsin, sem er eitt þeirra sveifluríkja sem getur ráðið úrslitum í kosningunum.
„Atkvæði ykkar ráða hvort við viljum vernda löghlýðna Bandaríkjamenn eða leyfa ofbeldisfullum stjórnleysingjum, vandræðagemsum og glæpamönnum að leika lausum hala.“
Trump fordæmdi „uppþot, gripdeildir, íkveikjur og ofbeldi sem við höfum séð í borgum sem lúta stjórn demókrata“.
Joe Biden, andstæðingur Trump í kosningunum, fékk einnig sinn skerf í ræðu forsetans.
„Bandaríkin eru ekki umlukin myrkri. Þau eru kyndillinn sem lýsir allan heiminn upp,“
sagði Trump og vísaði þarna til lýsingar Biden á stöðu mála í Bandaríkjunum á landsfundi Demókrata í síðustu viku.
Hann varaði síðan sterklega við Demókrötum:
„Hvernig geta þeir farið fram á að stýra landinu okkar þegar þeir eyða svona miklum tíma í að slíta landið í sundur?“
Sagði Trump og lýsti Biden sem manni sem eyðileggur bandarísk störf og „mikilfengleika Bandaríkjanna“.
