Þrír vinir voru myrtir á föstudagskvöldið þar sem þeir höfðu hist til að veiða að næturlagi við vatn í Flórída. Faðir eins þeirra fann þá en sonur hans náði að hringja í hann áður en hann lést. Lögreglustjórinn segir að um „slátrun“ hafi verið að ræða.

Lögreglan telur að fleiri en einn hafi verið að verki. Mennirnir voru myrtir um klukkan 22 á föstudagskvöldið við Lake Streety í Frostproof. Fórnarlömbin voru Damion Tillman 23 ára, Keven Springfield 30 ára og Brandon Rollins 27 ára.

Lögreglan telur að Tillman hafi komið fyrstu að vatninu. Þegar vinir hans komu hafi þeir séð að verið var að berja Tillman. Árásarmennirnir hafi þá byrjað að skjóta á þá.

Rollins var á lífi þegar árásarmennirnir yfirgáfu vettvang og náði að hringja í föður sinn og biðja um aðstoð. Faðir hans ók strax á vettvang en vatnið er í um 10 mínútna akstursfjarlægð frá heimili hans. Sonur hans var enn á lífi þegar hann kom. Faðirinn hafði flýtt sér svo mikið að hann gleymdi farsímanum sínum heima og varð að aka í næstu verslun til að hringja eftir hjálp. Þegar sjúkraflutningamenn komu á vettvang var sonur hans látinn.

Grady Judd, lögreglustjóri, hefur starfað við löggæslu í 48 ár segir að um „slátrun“ hafi verið að ræða.

„Þetta er skelfilegur vettvangur. Ég hef komið á marga morðvettvanga en þessi er einn af þeim verstu sem ég hef séð.“

Hann vildi ekki segja hvort einhver væri grunaður um morðin en sagði að lögreglan heiti 5.000 dollurum í verðlaun fyrir upplýsingar sem geta orðið til þess að málið leysist.