Christian B., sem er 43 ára, hefur hlotið dóma fyrir kynferðisofbeldi gagnvart börnum og fullorðnum. Það eitt bendir til að persónuleiki hans sé vægast sagt ógeðfelldur og miðað við fréttaflutning Sky News þá var heimili hans ekki miklu geðslegra.
Fréttastofan ræddi við nágranna hans, það er að segja fyrrum nágranna því maðurinn lét sig hverfa úr húsinu án nokkurs fyrirvara. Húsið er í Algarve í Portúgal.
„Við fundum ruslapoka með hárkollum og framandi fatnaði, hvort þetta voru bara grímubúningar eða eitthvað annað furðulegt get ég ekki sagt til um.“
Sagði nágranninn fyrrverandi meðal annars.
Christian B. bjó í Algarve 2007, þegar Madeleine hvarf. Hann var þá eiginlega útigangsmaður sem vann fyrir sér með því að taka að sér smáverkefni hér og þar. Ári áður bjó hann í niðurníddri byggingu á Algarve. Sky segir að frá húsinu liggi stígur niður að ströndinni þar sem Madeleine og fjölskylda hennar léku sér og nutu lífsins á áður en hún hvarf.
Þrátt fyrir að hann hafi yfirgefið húsið áður en Madeleine hvarf telur lögreglan að hann hafi haldið til í Praia da Luz, þar sem fjölskylda Madeleine var í fríi þegar hún hvarf. Lögreglan telur að hann hafi búið í VW T3 sendibíl sínum.
Nágranninn sagði að Christian B. hefði flutt í húsið um miðjan tíunda áratuginn en það passar við upplýsingar lögreglunnar um að hann hafi búið á svæðinu frá 1996 til 2007.
„Hann var alltaf svolítið reiður og ók hratt upp og niður veginn og síðan hvarf hann dag einn 2006 án þess að segja neitt. Ég held að hann hafi skuldað leigu. Um sex mánuðum síðar var ég beðinn um að aðstoða við að hreinsa húsið og það var ógeðslegt, algjör viðbjóður.“
Christian B. afplánar nú sjö ára fangelsisdóm í Þýskalandi fyrir nauðgun á 72 ára konu.
