Alberto Zangrillo, yfirlæknir á San Raffaele sjúkrahúsinu í Mílanó, hefur verið í eldlínunni í baráttunn við kórónuveiruna sem veldur COVID-19 sjúkdómnum. Mílanó er í Langbarðalandi sem er eitt þeirra svæða sem verst hefur farið út úr heimsfaraldrinum. Zangrillo segir að veiran sé að missa kraftinn og sé ekki eins hættuleg og banvæn og áður.

„Þau sýni, sem við höfum tekið síðustu 10 daga, sýna að magn veirunnar er óendanlega lítið miðað við sýni frá því fyrir einum eða tveimur mánuðum.“

Sagði hann í samtali við sjónvarpsstöðina RAI.

Ítalía er í þriðja sæti yfir fjölda látinna á heimsvísu af völdum COVID-19. Aðeins í Bretlandi og Bandaríkjunum hafa fleiri látist.

Zangrillo sagði að hann telji að sumir sérfræðingar gangi of langt þegar þeir vara við nýrri bylgju faraldursins og vill að stjórnmálamenn taki mið af nýrri stöðu.

„Við neyðumst til að fara aftur í fyrra horf og verða eðlilegt land.“

Ítalska ríkisstjórnin stígur þó varlega til jarðar og breytir ekki stefnu sinni um að fólk eigi að sýna ítrustu varkárni, forðast fjölmenni og gæta vel að þrifum og nota andlitsgrímur.