Hvernig stóð á því að einn af ríkustu mönnum Noregs var ekki með þjófavarnarkerfi, sem virkaði, á heimili sínu? Þessu hafa norskir fjölmiðlar velt upp að undanförnu eftir að skýrt var frá því að þjófvarnarkerfið á heimili Hagen-hjónanna hafi verið úrelt og að hjónin hafi ekki notað það.

Eins og flestir vita eflaust þá var Anne-Elisabeth Hagen numin á brott af heimili hennar og eiginmannsins, Tom Hagen, við Sloraveien 4 í útjaðri Osló í lok október 2018.

Á heimilinu voru hreyfiskynjarar inni í húsinu og skynjarar á gluggum og útidyrum. Ef kerfið fór í gang átti það að kveikja á eftirlitsmyndavélum sem myndu þá hefja upptöku. Kerfið var frá fyrirtækinu Verisure.

Vandinn var bara að hvorki kerfið né myndavélarnar höfðu verið notaðar síðan í nóvember 2017. TV2 skýrir frá þessu.

Heimili hjónanna bar ekki nein merki þess að þar ætti einn ríkasti maður landsins heima og Tom Hagen hefur alltaf látið lítið fyrir sér fara. En samt sem áður hafa fjölmiðlar velt fyrir sér af hverju svona auðugur maður hafi ekki tryggt öryggi heimilisins og fjölskyldu sinnar betur.

VG hefur áður skýrt frá því að Anne-Elisabeth hafi verið boðið nýtt þjófavarnarkerfi daginn áður en hún hvarf.

Hvorki Tom Hagen né verjandi hans, Svein Holden, hafa viljað tjá sig um af hverju úrelt og ónotað þjófavarnarkerfi hafi verið í húsinu en ekki nothæft kerfi.