Árið 1983 var Arnfinn Nesset dæmdur til þyngstu mögulegu refsingar sem norsk lög leyfa eða 21 árs fangelsi fyrir 22 morð. Hann er líklegast stórtækasti raðmorðingi norskrar sögu. Hann hefur nú afplánað dóminn og gengur laus en býr undir dulnefni á ónefndum stað. Hann er nú 83 ára.

Arnfinn var virðulegur tveggja barna faðir úr Þrændalögum. Hann var menntaður hjúkrunarfræðingur. 1975 var hann ráðinn sem hjúkrunarforstjóri á hjúkurnarheimilinu í Orkdal. Í upphafi ríkti mikil ánægja með hann og störf hans og var hann sagður einstakur. Hann var hjálpsamur og skilningsríkur. Vinir hans segja að hann hafi verið mjög trúaður og hafi sýnt öðru fólki áhuga og viljað því hið besta.

Nýlega var fjallað um mál Arnfinn í þættinum „Seriemorderen í Orkdal“ sem TV2 sýndi. Fram kom að 1977 hafi ákveðnar grunsemdir vaknað á hjúkrunarheimilinu. Hjúkrunarfræðingarnir töldu að mörg andlát heimilisfólks hafi verið mjög óvænt, nánast eins og þruma úr heiðskíru lofti. Það sem tengdi dauðsföllin var að Arnfinn hafði heimsótt sjúklingana rétt áður en þeir létust. Hjúkrunarfræðingarnir voru ragir við að skýra frá grunsemdum sínum án þess að hafa sterkar sannanir. Þegar upp komst í nóvember 1980 að Arnfinn hefði sankað að sér miklu magni af lyfinu Curacit var stjórn hjúkrunarheimilisins gert viðvart.

Curacit er lyf sem ekki er notað á hjúkrunarheimilum en einn millilítri af því getur banað manneskju á 90 sekúndum.

Í janúar 1981 hóf lögreglan rannsókn á málinu. Arnfinn sagðist hafa orðið sér úti um lyfið til að aflífa hund nágranna síns. Þessi framburður þótti ekki trúverðugur.

Eftir að hafa verið yfirheyrður í samtals 967 klukkustundir játaði Arnfinn að hafa orðið 30 manns að bana. Þegar hann hafði rætt við verjanda sinn dró hann allar játningarnar aftur og neitaði sök fyrir dómi. Hann sagðist hafa verið beittur þrýstingi í yfirheyrslunum.

Í mars 1983 var dómur kveðinn upp yfir Arnfinn eftir fimm mánaða löng réttarhöld. Hann var eins og áður sagði sakfelldur fyrir 22 morð og dæmdur í 21 árs fangelsi.

Arnfinn fékk reynslulausn 1993 eftir að hafa setið í 12 ár í fangelsi, að gæsluvarðhaldi meðtöldu. Hann var fyrirmyndarfangi í öll þessi ár. Hann er nú 83 ára og býr undir nýju nafni á óþekktum stað. Hann var sakfelldur þrátt fyrir að engin bein sönnunargögn lægju fyrir en ákæruvaldið byggði málflutning sinn á óbeinum sönnunum. Arnfinn neitaði sök fyrir dómi og var því ekki spurður af hverju hann hefði banað fólkinu.