Donald Trump, Bandaríkjaforseti, hefur skipað flota landsins að „skjóta á og eyðileggja“ farartæki íranska hersins ef þau ögra flotanum. Þessi fyrirmæli koma í kjölfar árekstra bandarískra herskipa við fallbyssuhraðbáta íranska hersins. Nýlega ögruðu íranskir fallbyssuhraðbátar bandarískum herskipum þar sem þau voru við æfingar við Kúveit.

En nú er þolinmæði Bandaríkjamanna á enda gagnvart þessu segir í umfjöllun The Independent. Eins og fyrr sagði ögruðu fallbyssuhraðbátar Írana bandarískum herskipum nýlega við Kúveit þar sem skipin voru við æfingar. 11 fallbyssuhraðbátar komu við sögu. Atburðarásin var tekin upp á myndband og á upptökunni má sjá að áhöfn eins fallbyssuhraðbátanna, hið minnsta, beindi vélbyssu að bandarísku skipi.

Íranski byltingarvörðurinn, sem á bátana, vísar gagnrýni Bandaríkjamanna á bug og segir að erfiðar aðstæður hafi komið upp vegna „ófagmannlegra og ögrandi aðgerða Bandaríkjamanna og að Bandaríkjamenn hafi ekki brugðist við aðvörunum“.