Þurr hósti er eitt helsta einkenni COVID-smits en önnur einkenni hafa einnig verið sögð nokkuð algeng. Má þar nefna beinverki, missi bragð- og lyktarskyns og hita. Nú hafa vísindamenn við tækni- og vísindaháskólann í Wuhan í Kína varað við tveimur nýjum einkennum sem fólk ætti að hafa í huga. Þau eru sögð vera væg en geti bent til þess að fólk sé smitað af veirunni.

Vísindamennirnir segja að höfuðverkur og svimi séu einkenni sem fólk þurfi að vera á varðbergi gagnvart. Þeir rannsökuðu 214 smitaða einstaklinga og spurðu þá út í hvaða einkennum þeir hefðu fundið fyrir. 36 prósent þeirra sögðust hafa fundið fyrir áhrifum á taugakerfið, þar á meðal höfuðverk og svima. Beinverkir og taugaverkir voru einnig nefndir til sögunnar.

Í sumum tilfellum komu þessi einkenni fram samhliða öndunarörðugleikum, hósta og hita.

Niðurstöður rannsóknarinnar hafa verið birtar í JAMA Neurology. Þar segir Ling Mao, aðalhöfundur hennar, að sjúklingar og læknar verði að gefa margvíslegum heilsufarseinkennum góðan gaum í tengslum við COVID-19.