Eftir þriggja vikna útgöngubann og lokað samfélag deyja mörg hundruð manns enn daglega á Ítalí af völdum COVID-19. Fólk hefur ekki geta sótt vinnu og margir eru orðnir uppiskroppa með peninga og eiga ekki fyrir mat og eru auk þess búnir með þann mat sem til var.

Í umfjöllun Sky um málið kemur fram það gangi hægt að halda aftur af útbreiðslu veirunnar og samhliða því og fjölda dauðsfalla fari þolinmæði og vonir fólks dvínandi og sífellt fleiri beini sjónum sínum að efnahagslegum kostnaði þeirra aðgera sem gripið hefur verið til.

Mörg myndbönd hafa flætt um samfélagsmiðla þar sem sést hversu slæmt ástandið er hjá mörgum. Í einu þeirra sést íbúi í Apulia sem kallaði eftir lögregluaðstoð eftir að bankinn lokaði og hann gat ekki tekið lífeyri móður sinnar út, einu tekjur þeirra mæðgina. Á upptökunni sést hann öskra á lögreglumenn, segja þeim að fjölskyldan eigi enga peninga, móðir hans grátbiðja lögreglumennina um að fara heim til þeirra og sannreyna að þau eigi engan mat. Örvæntingin er mikil.

Í öðru myndbandi sést faðir með ungri dóttur sinni og ávarpar hann forsætisráðherrann og segir að það sé liðnir 15 til 20 dagar síðan þau fóru síðast út og nú séu þau komin að þolmörkum. Hann bendir síðan á dóttur sína, sem er að borða brauð, og segir:

„Eins og dóttir mín munu fleiri börn ekki fá neitt að borða eftir nokkra daga. Þú getur verið viss um að þú munt sjá eftir þessu því við munu efna til byltingar.“

Fréttir hafa borist af því að fólk hafi stolið mat úr stórverslunum því það eigi enga peninga. Hópar hafa verið stofnaðir á samfélagsmiðlum þar sem fólk sammælist um að gera áhlaup á stórmarkaði til að verða sér úti um mat.

Sky hefur eftir bæjarstjóranum í Palermo á Sikiley að glæpagengi nýti sér erfiðar aðstæður fólks og kyndi undir ofbeldi. Hann segir hættu á að fljótlega verði algjört stjórnleysi og neyðarástand.

„Óánægja og hungur fer vaxandi og við fáum tilkynningar um mótmæli og reiði sem glæpamenn nýta til að raska jafnvæginu í kerfinu. Eftir því sem lengri tími líður gengur á það sem fólk á. Það litla sparifé sem fólk á er að verða uppurið.“

Sagði borgarstjórinn Leoluca Orlando.

Ítalska ríkisstjórnin hefur heitið 25 milljörðum evra til að styðja við fjölskyldur og fyrirtæki sem hafa farið illa út úr útgöngubanninu. Margir segjast enn bíða eftir hjálp. Aðrir uppfylla ekki skilyrði fyrir hjálp því þeir hafa ekki verið skráðir opinberlega á vinnumarkaði. Í landinu er mikill fjöldi fólks sem vinnur svart, flestir í suðurhlutanum. Þetta fólk er því hvergi á skrá sem launþegar og því á það ekki rétt á stuðningi.