Allra mestu knattspyrnuáhugamenn heimsins hafa undanfarið beint sjónum sínum að Hvíta-Rússlandi til að geta fylgst með knattspyrnuleikjum. Í útsendingum frá þeim sést vel að engar takmarkanir eru á fjölda áhorfenda á völlunum og eru þeir fjölmargir og standa og sitja þétt saman. Sem sagt kjöraðstæður fyrir útbreiðslu COVID-19.
Það er þó rétt að taka fram að á sumum leikvöngum var líkamshiti áhorfenda mældur áður en þeir fengu að fara inn. Örfáir áhorfendur voru með andlitsgrímur á þéttskipuðum áhorfendapöllunum.
Knattspyrnusamband landsins segir að engar fyrirætlanir séu uppi um að fresta leikjum eða aflýsa tímabilinu. Alexander Lukashenko, forseti landsins, er áhugamaður um íþróttir og tók sjálfur þátt í ísknattleik á laugardaginn og sagði af því tilefni að „íþróttir væru besta vörnin gegn veirunni“.
„Það er betra að deyja standandi en liggjandi á hnjánum.“
Sagði hann einnig við fréttamann. Þegar hann var spurður hvort eitthvað gæti aftrað honum frá að spila ísknattleik sagði hann:
„Það er hugsanlegt, en af hverju? Ég skil ekki. Það eru engir vírusar hér. Sérð þú þá fljúga um? Ég sé þá heldur ekki. Þetta er ísskápur.“
Um 100 hafa greinst með COVID-19 í þessu 9,5 milljón manna landi.
Lukashenko hefur stýrt landinu síðan 1994. Hann hefur gert lítið úr þörfinni fyrir að fólk haldi sig fjarri öðru fólki til að forðast smit. Hann hefur ráðlagt landsmönnum að drekka 50 ml af vodka á dag til að halda veirunni frá. Þetta ráð gengur algjörlega gegn öllum ráðlegginum Alþjóðaheilbrigðismálastofnunarinnar WHO.
Forsetinn hefur einnig haldið því fram að regluleg gufuböð, vinna á ökrum úti og að borða morgunmat á réttum tíma séu bestu aðferðinar til að halda sér heilbrigðum.
