Það hefur varla farið framhjá mörgum að COVID-19 kórónuveirufaraldur herjar nú á heimsbyggðina með skelfilegum afleiðingum. En svo ótrúlegt sem það nú er þá er hópur Evrópubúa sem hefur ekki hugmynd um hvernig ástandið er þessa dagana og fær ekki fregnir af því fyrr en í maí.

Geimfarar, sem dvelja í Alþjóðlegu geimstöðinni, vita af faraldrinum og eru því betur upplýstir um stöðu mála en áhöfn fransks kjarnorkukafbáts sem er einhversstaðar djúpt neðansjávar í einhverju heimshafanna.  Kafbáturinn lét úr höfn áður en útgöngubann var sett á í Frakklandi þann 17. mars.

Kafbátarnir eru venjulega í 60-70 daga í leiðöngrum sínum og eru nær algjörlega sambandslausir við umheiminn á meðan. Ekkert netsamband er og einu skilaboðin sem berast til bátanna eru þau sem herstjórnin sendir þeim.

Yfirmenn kafbátaflotans hafa einmitt ákveðið að halda upplýsingum um heimsfaraldurinn frá áhöfninni til að koma í veg fyrir vitneskja um hann hafi neikvæð áhrif á móralinn um borð.

„Þeir vita þetta ekki. Strákarnir um borð verða að halda fullri einbeitingu við verkefni sín.“

Hefur AP eftir Dominoque Salles, fyrrum aðmírál, en hann þekkir vel til mála franska flotans. Hann sagði líklegt að skipstjórinn hafi fengið vitneskju um faraldurinn án þess þó að honum hafi verið skýrt frá honum í smáatriðum. Hann sagðist telja líklegt að áhöfnin verði upplýst um málið rétt áður en kafbáturinn kemur í höfn.