Árum saman hafa Kínverjar og Nepalar deilt um hvernig haga skyldi mælingum á hæð Everestfjalls sem er óumdeilanlega hæsta fjall heims. Deilan snerist um hvort taka ætti snjó á toppi fjallsins með í útreikninginn. Nú hafa löndin tvö náð samkomulagi um nýja opinbera hæð fjallsins og er það 8.849 metrar samkvæmt samkomulagi þeirra.

Til að fyllstu nákvæmni sé gætt þá er það raunar 8.848,86 metrar að því er segir í sameiginlegri yfirlýsingu landanna. Bæði löndin sendu mælingamenn upp hlíðar fjallsins til að mæla hæðina.

Mælt frá toppi snjóalaga á toppi fjallsins er fjallið 8.849 metra yfir sjávarmáli en það er þessi hæð sem Nepalmenn hafa alltaf haldið fast í sem opinbera og rétta hæð fjallsins. Kínverjar notuðust hins vegar við mælingu á fjallinu sjálfu, án snjóalaga, og var það 4 metrum lægra samkvæmt þeirra mælingum.  Það má því kannski segja að Nepal hafi borið sigur úr býtum í þessari deilu. Yfirvöld í löndunum segja að þessi sameiginlega niðurstaða þeirra sé „ævarandi merki um vinskap Nepal og Kína“.

Auk deilu um hvort taka ætti snjóinn með í mælinguna þá hafa verið uppi umræður um hvort fjallið hafi lækkað aðeins eftir stóran jarðskjálfta í Nepal 2015.