Sérfræðingar hjá Alþjóðaheilbrigðisstofnuninni WHO segja að yfirstandandi kórónuveirufaraldur sé „ekki endilega stóri faraldurinn“ þrátt fyrir að hann sé alvarlegur. Þeir segja einnig að heimsbyggðin verði að læra að lifa með þessari kórónuveiru.

David Heymann, prófessor og formaður ráðgjafanefndar WHO um smitsjúkdóma, sagði á fréttamannafundi á mánudaginn að það séu „örlög“ veirunnar að verða landlæg og það þrátt fyrir að bólusetningar séu hafnar í Bandaríkjunum og Bretlandi. „Heimurinn hefur vonast eftir hjarðónæmi, þannig að það dragi úr útbreiðslunni ef nægilega margir eru ónæmir,“ sagði hann að sögn The Guardian.

Hann sagði að hugtakið „hjarðónæmi“ væri misskilið. „Það virðist sem örlög SARS-CoV-2 (COVID-19) séu að verða landlæg en það hafa fjórar aðrar kórónuveirur orðið og að hún muni halda áfram að stökkbreytast þegar hún fjölgar sér í frumum fólks, sérstaklega á svæðum með miklu smiti,“ sagði hann. Hann tók einnig fram að sem betur fer búi mannkynið yfir getu til að bjarga mannslífum og það ásamt góðri lýðheilsu geri okkur kleift að læra að lifa með COVID-19.

Mark Ryan, yfirmaður neyðaráætlunar WHO, sagði að líklegt sé að veiran verði landlæg og ógn muni stafa af henni en hún verði ekki mikil vegna bólusetninga um allan heim. „Þessi faraldur hefur verið mjög alvarlegur … áhrifa hans hefur gætt um allan heim. En þetta er ekki endilega stóri faraldurinn,“ sagði hann og bætti við að þetta væri ákall til heimsbyggðarinnar um að vakna og vera undir svona faraldra búin.