LiveScience skýrir frá þessu. Fram kemur að rannsóknin hafi verið birt þann 14. desember í arXiv gagnagrunninum. Í rannsókninni var stuðst við nútíma stjörnufræði og tölfræðilíkön til að kortleggja uppruna og dauða vitsmunalífs í Vetrarbrautinni. Þrír eðlisfræðingar hjá Caltech og einn menntaskólanemi gerðu rannsóknina. Í henni kemur fram hvar og hvenær líklegt má teljast að líf verði til eða hafi orðið til í Vetrarbrautinni. Einnig er farið yfir mikilvægustu skilyrðin fyrir útbreiðslu lífs og það sem ógnar henni mest: Tilhneigingu vitsmunalífs til að gjöreyða sjálfu sér.
Við rannsóknina var notast við þekkingu okkar á þáttum sem eru taldir hafa áhrif á þróun vitsmunalífs, til dæmis tilvist stjarna sem plánetur, sem líkjast jörðinni, eru á braut um, tíðni banvænna geislana frá sprengistjörnum, líkurnar á að tími og nauðsynleg skilyrði séu fyrir hendi til að líf geti myndast og hugsanlega tilhneigingu vitsmunasamfélaga til að eyða sér.
Út frá þessum forsendum og þróun Vetrarbrautarinnar frá upphafi komust vísindamennirnir að þeirri niðurstöðu að líkurnar á að líf hafi myndast hafi náð hámarki um 13.000 ljósárum frá miðju Vetrarbrautarinnar og átta milljörðum ára eftir að hún myndaðist.
Jörðin er um 25.000 ljósár frá miðju Vetrarbrautarinnar og mannkynið varð til um 13,5 milljörðum eftir að Vetrarbrautin myndaðist. Þetta þýðir að við erum nokkurskonar útverðir hvað varðar landafræði í Vetrarbrautinni og urðum seint til miðað við önnur samfélög vitsmunavera. En ef gengið er út frá því að líf myndist nokkuð oft og verði að lokum vitsmunalíf þá eru líklega önnur samfélög vitsmunavera í Vetrarbrautinni, líklega á fyrrgreindu 13.000 ljósárasvæði en þar er mikið af stjörnum sem líkjast sólinni okkar.
Vísindamennirnir segja að flest önnur samfélög vitsmunavera í Vetrarbrautinni séu líklega ung vegna þess hversu líklegt það er að vitsmunalíf hafi eytt sjálfu sér fyrir löngu síðan. Ef að samfélög vitsmunavera náðu hámarki fyrir 5 milljörðum ára þá eru flest þau samfélög nú horfin af sjónarsviðinu út af fyrrgreindi tilhneigingu þeirra til að eyða sjálfum sér að mati vísindamannanna.
