Stjörnufræðingar, sem vinna að stærsta verkefni sögunnar hvað varðar leit að vitsmunalífi utan jarðarinnar, eru nú að rannsaka áhugaverð útvarpsmerki sem virðast hafa komið frá Proxima Centauri en það er sú stjarna sem er næst sólinni okkar. Merkin voru numin með Parkes útvarpssjónaukanum í Ástralíu í apríl og maí á síðasta ári í 30 klukkustunda verkefni.

The Guardian skýrir frá þessu. Fram kemur að greining á merkjunum hafi staðið yfir í langan tíma og vísindamenn eigi enn eftir að útiloka að þau hafi komið frá tækjum hér á jörðinni eða gervihnöttum á braut um jörðina.

Þessi merki gætu átt sér eðlilega skýringu, til dæmis að þau sé af mannavöldum, en það vekur athygli að um þröngan geisla er að ræða eða um 980 MHz. Einnig skipta þau um tíðni í takt við hreyfingu plánetu. Þetta hefur vakið vonir um að hér hafi loksins verið numin útvarpsmerki frá vitsmunaverum utan jarðarinnar. Guardian segist hafa heimildir fyrir að vísindamenn séu nú að vinna að rannsókn á merkjunum.

Merkin hafa ekki verið numin aftur en þau bárust úr þeirri átt sem Proxima Centauri er í en það er rauður dvergur í um 4,2 ljósára fjarlægð frá jörðinni. Heimildarmaður Guardian sagði að þessi merki væru fyrstu alvöru „kandídatinn“ síðan Wow! merkið var numið 1977.

Wow! merkið var stutt útvarpsmerki á þröngu tíðnisviði sem var numið í Big Ear Radio Observatory í Ohio 1977. Viðurnefnið Wow! fékk merkið eftir að stjörnufræðingurinn Jerry Ehman skrifaði Wow! við hlið þess á útskriftina með því.