Við vitum að bjarndýr leggjast í híði á veturna og það gera leðurblökur einnig. Evrópskir broddgeltir gera það líka. Nú telja vísindamenn hugsanlegt að forfeður okkar hafi einnig gert þetta til að lifa harða vetur af.

Þetta byggja þeir á rannsóknum á steingervingum sem fundust á Spáni. Um er að ræða bein og í þeim fundu vísindamennirnir ummerki um breytingar á milli árstíða. Þetta telja þeir geta verið vísbendingu um að Neanderdalsmenn og fyrirrennarar þeirra hafi notað sömu aðferð og bjarndýr og lagst í dvala. The Guardian skýrir frá þessu.

Fram kemur að gögn úr beinunum, sem fundust á einu mikilvægasta steingervingasvæði heims, bendi til að forfeður okkar af mannaættum hafi glímt við mikla kulda fyrir mörg hundruð þúsund árum og hafi tekist á við hann með því að sofa veturinn af sér. Vísindamennirnir segja að útlit beina, sem eru steingerð, og skemmdir á þeim séu samskonar og á beinum dýra sem leggjast í dvala. Þetta bendi til að forfeður okkar hafi glímt við erfiða vetur með því að hægja á efnaskiptum sínum og sofa mánuðum saman. Þessar niðurstöður byggjast á uppgreftri á steingervingum í helli, sem nefnist Sima de los Huesos, í Atapuerca á Spáni.

Á síðustu þremur áratugum hafa steingerðar leifar tuga forfeðra okkar verið grafnar upp úr jarðlögum þar. Hellirinn er í raun fjöldagröf að sögn vísindamanna sem hafa fundið mörg þúsund tennur og bein þar. Steingervingarnir eru allt að 400.000 ára og eru líklega af fyrstu Neanderdalsmönnunum eða forverum þeirra. Niðurstöður rannsóknarinnar hafa verið birtar í tímaritinu L‘Anthropologie.