Sky News skýrir frá þessu. Fram kemur að Ouali sé eftirlýstur fyrir morðið á Jean Meyer árið 2011. „Öllum sem verða á vegi hans stafar hætta af honum,“ sagði Jacques Croly, talsmaður lögreglunnar, í samtali við Sky News. „Fólk sem hittir hann ætti að vera meðvitað um það,“ sagði hann einnig.
Lögreglan segir að Quali hafi ráðist á Meyer með exi og veitt honum fjölda áverka í flugturni í Mulhouse þar sem þeir störfuðu báðir. Ouali glímdi við þunglyndi, ofsóknaræði og geðklofa að sögn Croly. Af þessum sökum hafði læknir leyst hann undan starfsskyldum.
Talið er að Ouali hafi flúið til Sviss eftir morðið og hafi breytt O í Q í ættarnafni sínu.
„Hann er mjög snjall, mjög greindur. Hann hefur sent okkur fjölda falskra vísbendinga,“ sagði Croly. Talið er að hann hafi farið til Macau frá Sviss og síðan áfram til Hong Kong. Þar var hann handtekinn 2014 og settur í fangelsi í skamman tíma eftir að upp komst að hann hafði notað falsað vegabréf. Hann hvarf 2016 en fyrir tveimur árum fékk franska lögreglan ábendingu um að hann væri í Hong Kong og segir að ekkert hafi síðan komið fram sem bendi til að hann hafi farið þaðan. Hann þurfti að afhenda þarlendum yfirvöldum vegabréf sitt og er því skilríkjalaus að sögn Croly. „Hann tilheyrir ekki skipulögðum glæpasamtökum, á ekki falda peninga. Hann verður því að skapa sér nýtt líf í Hong Kong – hann á nýja konu, son og líklega nýja vini“, sagði hann einnig.
