Taívan er lítil eyja, eða aðeins um 36.000 ferkílómetrar, og því búa þessar 23 milljónir mjög þétt. Frá upphafi heimsfaraldursins hafa aðeins 763 greinst með kórónuveiruna og sjö hafa látist miðað við tölur Johns Hopkins háskólans.
Yfirvöld hafa því ekki þurft að grípa til mjög harðra sóttvarnaaðgerða en það þýðir ekki að ekki hafi verið gripið til aðgerða til að hemja útbreiðslu veirunnar. Fólk er hitamælt þegar það fer á sjúkrahús, veitingastaði og fleiri staði. Það verður einnig að nota andlitsgrímur í almenningssamgöngufarartækjum. Yfirvöld hertu nýlega kröfurnar um notkun andlitsgríma og nú þarf að nota þær í skólum, veitingastöðum og á menningarviðburðum auk fleiri staða. Þetta er ekki gert vegna þess að smitum hafi fjölgað í landinu heldur af því að smitum fjölgar annars staðar í heiminum og nú er kominn vetur svo fólk er meira innanhúss.
Í landinu er notað mjög skilvirkt kerfi þegar kemur að smitsjúkdómum og það hefur komið að gagni í baráttunni við kórónuveiruna. Mikið var tekið af sýnum í upphafi faraldursins og sóttkví er óspart beitt ef grunur er um smit. Smitrakning er einnig stór hluti af taktíkinni og fylgst er náið með þeim sem greinast með veiruna. Fólk þarf að fara í 14 daga einangrun og því er fylgt eftir að fólk virði hana. Háar sektir liggja við brotum gegn því en sektarupphæðirnar hlaupa á sem nemur mörg hundruð þúsund íslenskum krónum.
Stíft eftirlit hefur einnig verið á landamærum landsins og allir sem koma til landsins þurfa að fara í 14 daga einangrun.
