Samband Melania Trump, eiginkonu Donald Trump Bandaríkjaforseta, og Ivanka Trump, dóttur forsetans úr fyrra hjónabandi, er að sögn ekki mjög gott, eiginlega bara ískalt. Það sama á við um samband Melania við Jared Kushner, eiginmann Ivanka. Þetta segir Stephanie Winston Wolkoff, fyrrum vinkona og persónulegur ráðgjafi Melania.

Wolkoff skrifaði bókina „Melania and Me: The Rise and Fall of My Friendship with the First Lady“. Í bókinni afhjúpar hún eitt og annað varðandi Melania og líf hennar. Wolkoff hefur einnig opinberað hljóðupptökur, sem hún gerði í leyni, af trúnaðarsamtölum sínum við Melania í Hvíta húsinu. Í þeim kemur meðal annars fram að Melania var mjög ósátt við þá gagnrýni sem var beint að henni og að hún hataði í raun að þurfa að skreyta Hvíta húsið fyrir jólin. Hún tjáði sig einnig um Stormy Daniels, sem heldur því fram að hún hafi verið ástkona forsetans um hríð.

Í nýjasta hlaðvarpi The New Abnormal frá The Daily Beast er fjallað um samband Melania og Ivanka. Í þættinum kemur fram að Melania og Ivanka eigi næstum í stríði. Melania kallar Ivanka nær alltaf „prinsessuna“ og Wolkoff lýsir því hvernig Ivanka, sem er einn nánasti ráðgjafi föður síns, hafi reynt að koma sjálfri sér í stöðu sem einhverskonar forsetafrú. „Ivanka stal skylduverkum Melania og fór lengra en staða hennar og heimild náði,“ segir Wolkoff í hlaðvarpinu og útskýrir þetta nánar með því að segja að Ivanka hafi „stolið“ starfsfólkinu sem var ætlað forsetafrúnni.

#MelaniaAndMeTapes LISTEN to a clip of Melania telling me about Ivanka and Jared on Part 1 of @NewAbnormalPod @MollyJongFast @thedailybeast.@IvankaTrump is the "Princess" who wanted to be Queen.@Flotus claims my book, MELANIA and ME, is "full of mistruths." You be the judge! pic.twitter.com/BjBuk5eBLs

— Stephanie Winston Wolkoff (@SWWCreative) December 19, 2020

„Þú ræður ekki fólk sem forsetafrúin vill hafa. „Prinsessan“ vildi gera Melania léttvæga. Melania kallar þau „slöngur“, Jared og Ivanka, og þau gera allt til að fá það sem þau vilja og það fá þau líka,“ segir Wolkoff í hlaðvarpinu.

Wolkoff var árum saman náin vinur forsetahjónanna. Hún tók þátt í skipulagningu innsetningarathafnarinnar þegar Trump var settur í forsetaembættið og síðan var hún ráðin sem ráðgjafi Melania. Vináttu þeirra lauk skyndilega fyrir nokkrum árum þegar fram kom að ekki hafði allt verið sem skyldi hvað varðaði fjármögnun innsetningarathafnarinnar. Fyrirtækið Wolkoff var sagt hafa fengið 26 milljónir dollara fyrir verkefnið. Í kjölfarið sleit Melania öllu sambandi við Wolkoff og rak hana úr starfi. Wolkoff neitar að hafa fengið svona háar fjárhæðir og segist hafa fengið um 1,6 milljónir dollara fyrir verkefnið og hafi þeir peningar verið notaðir í launagreiðslur handa starfsfólki hennar.