„Frystarnir eru tómir og framleiðslan er minni en eftirspurnin“ sagði Tor Erik Aag, forstjóri Kolonial.no sem sér um matvæladreifingu í Noregi, um stöðuna hvað varðar beikon í landinu í samtali við Nettavisen.

Hann hvatti landa sína til að taka því rólega þegar þeir versla í matinn og sleppa því að hamstra beikon. „Það er stöðugt verið að framleiða beikon svo það er engin ástæða til að hamstra. Það getur þó komið fyrir öðru hvoru að það sé uppselt og það verður minna framboð um hríð,“ sagði hann einnig.

Eftirspurnin eftir beikoni er sérstaklega mikil nú á aðventunni því vinsælt er að borða beikon með heitri lifrarkæfu eða nota það í salöt eða aðra rétti. En hugsanlega verða norskir matgæðingar að sætt sig við að fá ekki nóg beikon þetta árið.

Ástæðuna fyrir þessum beikonskorti má að sögn rekja beint til heimsfaraldurs kórónuveirunnar. Norðmenn fara yfirleitt í stórum stíl til Svíþjóðar að versla kjöt og þar með beikon. En vegna kórónuveirunnar hefur dregið mjög úr slíkum verslunarferðum og því er meiri eftirspurn eftir beikoni í Noregi en venjulega.

Tor Erik Aag sagði að innflutningur á beikoni hjálpi til við að laga stöðuna en birgjar telji að staðan verði ekki orðin góð fyrr en  í lok janúar.