Talið er að liðsmenn sveitarinnar hafi farið til Teheran gagngert til að ráða al-Masri af dögum. Þetta hefur ekki verið áhættulaus ferð því Íran og Ísrael elda grátt silfur og eru erkifjendur. Það hlýtur að hafa verið mikið áfall fyrir írönsk stjórnvöld að liðsmenn Mossad hafi getað komist alla leið til höfuðborgarinnar, myrt þar hryðjuverkamann sem var undir verndarvæng stjórnvalda, og komist á brott.
Það var snemma kvölds þann 7. ágúst sem al-Masri og dóttir hans óku í gegnum millistéttarhverfið Pasdaran í Teheran. Skyndilega birtust útsendarar Mossad og skutu þau til bana með fimm skotum úr skammbyssum með hljóðdeyfum. Útsendararnir hurfu síðan á brott á mótorhjóli, jafn skyndilega og þeir birtust.
Samkvæmt fréttum New York Times og CNN, sem hafa heimildir frá bandarískum leyniþjónustumönnum, þá hafði CIA komist á snoðir um dvalarstað al-Masri og beðið Mossad að drepa hann.
Al-Masri hafði árum saman verið eftirlýstur af bandarískum yfirvöldum fyrir aðild hans að sprengjutilræðum við bandarísku sendiráðin í Tansaníu og Kenía 1998. 224 létust í þessum árásum. 10 milljónum dollara hafði verið heitið í verðlaun fyrir upplýsingar sem gætu leitt til þess að hann fyndist.
Al-Masri starfaði innan raða al-Kaída og hafði verið útnefndur arftaki Ayman al-Zawahiri núverandi leiðtoga samtakanna.
Í fyrstu sögðu írönsk stjórnvöld að það hefði verið líbanskur sagnfræðiprófessor sem var skotinn til bana. En margir fjölmiðlar hafa bent á að umræddur prófessor sé ekki til og hafi aldrei verið til. Um miðjan nóvember sendi íranska utanríkisráðuneytið frá sér tilkynningu þar sem sagði að öðru hvoru reyni yfirvöld í Ísrael og Bandaríkjunum að tengja Íran við hryðjuverkahópa á borð við al-Kaída með lygum og fölskum upplýsingum. Þetta sé gert til að leyna þeirra eigin ábyrgð á starfsemi hryðjuverkasamtaka í heimshlutanum.
En hvað sem afneitunum íranskra yfirvalda líður þá dvaldi al-Masri í Íran frá 2003. Í fyrstu var hann í stofufangelsi ásamt fleiri leiðtogum al-Kaída en frá 2015 var hann frjáls ferða sinna. Hann bjó í norðurhluta Teheran. Það var einmitt þar sem CIA staðsetti hann og bað Mossad um að grípa til aðgerða, meðal annars vegna þess að al-Masri væri að skipuleggja árásir á bandarísk skotmörk og gyðinga.
Mossad brást við þessari beiðni CIA og var úrvalssveitin Kidon sett í verkefnið. Kidon er þekkt sem „það besta af því besta“. Sveitin jafnast á við úrvalssveitir ýmissa herja, sveitir sem oft eru sendar langt að baki víglínunnar í upphafi átaka.
Eins og gefur að skilja er allt er viðkemur Kidon umvafið leyndarhjúp en talið er að sveitin hafi stofnuð á sjöunda áratugnum. Henni er skipt upp í litla hópa með fjórum liðsmönnum í hverjum. Stundum eyða liðsmenn hennar mánuðum í óvinalandi við að njósna um ákveðin skotmörk, einstaklinga. Liðsmenn sveitarinnar eru sérhæfðir í morðum á óvinum Ísraels. Talið er líklegt að sveitin sem drap al-Masri hafi fylgst með honum í langan tíma áður en látið var til skara skríða. En ekki er vitað hvort það var tilviljun ein eða vel skipulagt að látið var til skara skríða 7. ágúst en þá voru nákvæmlega 22 ár liðin frá sprengjuárásunum á sendiráðin í Kenía og Tansaníu.
Drápið á al-Masri og dóttur hans, Maryam Abdullah, líkist mjög nokkrum morðum sem hafa verið framin í Íran á undanförnum árum. Grunur leikur á úrvalssveitir Mossad hafi einnig staðið á bak við þau. Meðal fórnarlambanna voru íranskir kjarnorkusérfræðingar sem unnu við kjarnorkuáætlun landsins. Þeir voru skotnir til bana á götu úti og morðingjarnir flúðu á mótorhjólum.
Maryam Abdullah var gift Hamza bin Laden, syni Osama bin Laden, sem var drepinn af Bandaríkjamönnum á síðasta ári. Hún er talin hafa gegnt stóru hlutverki innan al-Kaída, þar á meðal við skipulagningu hryðjuverka.
