Um helgina skýrði New York Times frá því að þann 7. ágúst síðastliðinn hafi útsendarar ísraelsku leyniþjónustunnar Mossad myrt Abu Muhammad al-Masri, einnig þekktur undir nafninu Abdullah Ahmed Abdullah, á götu úti í Teheran. Auk hans var dóttir hans, Miriam, drepin en hún var ekkja Hamza bin Laden, eins sonar hryðjuverkamannsins Osama bin Laden, sem var drepinn af bandarískum hermönnum á landamærum Afganista og Pakistan. Morðið á al-Masri átti sér stað nákvæmlega 22 árum eftir hryðjuverkaárás á sendiráð Bandaríkjanna í Kenía og Tansaníu en 224 létust í árásunum. Al-Masri er talinn hafa verið höfuðpaurinn á bak við þær árásir. Bandarísk stjórnvöld eru sögð hafa staðið á bak við morðið en Mossad hafi séð um framkvæmd þess.

Samkvæmt frétt New York Times þá voru það tveir menn á mótorhjóli sem skutu feðginin til bana í Teheran. Blaðið segir að bandarísk yfirvöld hafi árum saman fylgst með al-Masri og öðrum hryðjuverkamönnum sem halda til í Íran. Al-Masri var talinn líklegur til að verða næsti leiðtogi al-Kaída hryðjuverkasamtakanna. Íranir hafa þvertekið fyrir að hryðjuverkamenn úr al-Kaída haldi til í Íran og segja ekkert hæft í að al-Masri hafi verið myrtur þar í landi. Þetta sé hreinn uppspuni í „Hollywoodstíl“ hjá bandarískum fjölmiðlum.

Blaðið segir að al-Masri hafi verið í „haldi“ Írana síðan 2003 en hafi lifað sem frjáls maður í fínu úthverfi í Teheran síðustu fimm árin. Bandarísk yfirvöld telja að honum hafi verið leyft að búa í Íran til að geta skipulagt árásir á Bandaríkin en al-Kaída og Íran eiga það sameiginlegt að vera óvinir Bandaríkjanna.