Þegar Ellie opnaði réðst Thomas á hana og tók hana hálstaki, því næst stakk hann hana 13 sinnum með hníf. Það var faðir Ellie sem fann hana látna en fjölskyldan bjó í Wilshire á Englandi. Thomas var á síðasta ári dæmdur í 12,5 ára fangelsi fyrir morðið. Hann játaði að hafa orðið Ellie að bana en vildi ekki segja af hverju.
„Þetta nístir í hjartastað. Engin móðir ætti nokkru sinni að þurfa að halda í kalda hönd dóttur sinnar. Þetta er svo rangt. Þetta er hræðilegt,“
sagði Carole Gould, móðir Ellie, í samtali við The Sun.
Thomas reyndi að leyna því að hann hefði verið að verki með því að reyna að láta líta út fyrir að Ellie hefði tekið eigið líf. Hann setti hnífinn í hönd hennar, notaði fingur hennar til að taka síma hennar úr lás og skrifa skilaboð til vinkvenna hennar.
Hann neitaði að vera viðriðinn málið þegar lögreglan yfirheyrði hann og sagðist ekki hafa verið nærri heimili Gould-fjölskyldunnar. En símagögn hans sýndu annað. Einnig komu þrjú merki á andliti hans upp um hann. Þegar lögreglan yfirheyrði hann sáust merkin vel og voru greinilega ný. Þau líktust klórförum að sögn Jim Taylor lögreglumanns sem sagði þau hafa verið eins og týpískir áverkar eftir einhvern sem reynir að verjast árás.
Eftir morðið ók Thomas út í skóg þar sem hann losaði sig við ýmislegt áður en hann fór aftur í skólann. Hann sendi því næst vinum sínum óhugnanleg skilaboð þar sem hann sagðist hafa klórað sig í andlitið vegna álags sem hann væri undir.
„Ég held að allir hafi tekið eftir því að ég hef verið mjög dapur að undanförnu og ég verð að segja ykkur af hverju. Ellie og ég erum hætt saman og ætlum að sjá hver staðan er að prófum loknum. Auk þess greindist faðir minn með krabbamein og amma mín var lögð inn á sjúkrahús vegna vandræða með hjartað. Ég hef verið svo stressaður að undanförnu að ég veit ekki hvernig ég á að takast á við þetta allt. Ég hef klórað mig í kringum hálsinn og þið eruð bestu vinir mínir og ég veit ekki hverja aðra ég get talað við,“
skrifaði hann.
