„Ég vil ekki að þessir glæpir verði grafnir að eilífu,“
sagði Lee fyrir dómi í Suwon. Hann játaði morðin fyrir lögreglunni á síðasta ári en játning hans fyrir dómi var sú fyrsta sem hann gerir fyrir dómi og opinberlega. Áður hafði annar maður, Yoon, verið dæmdur fyrir eitt af morðunum. Hann var látinn laus árið 2008 eftir að hafa setið 20 ár í fangelsi. Fullt nafn hans hefur ekki verið gert opinbert af yfirvöldum. Hann var á sínum tíma sakfelldur fyrir að hafa nauðgað og myrt 13 ára stúlku. Það var eitt tíu morða sem voru framin á árunum 1986 til 1991 og ganga undir heitinu Hwaseong-morðin.
Hin níu morðin voru óleyst en á síðasta ári hóf lögreglan að rannsaka þau á nýjan leik eftir að lífsýni tengdu Lee við sum þeirra. CNN skýrir frá þessu.
Yoon, sem hafði alla tíð haldið fram sakleysi sínu, fór þá fram á að mál hans yrði tekið fyrir á nýjan leik og það var einmitt í tengslum við þá málsmeðferð sem Lee bar vitni.
Fyrir dómi sagði Lee að hann hefði verið yfirheyrður af lögreglunni á sínum tíma og hafi þá verið með armbandsúr eins fórnarlambanna á sér.
„Ég skil ekki af hverju ég var ekki grunaður. Glæpir áttu sér stað allt í kringum mig og ég reyndi ekki mikið að leyna neinu svo ég hélt að ég myndi auðveldlega nást. Það voru mörg hundruð lögreglumenn. Ég var alltaf að rekast á lögreglumenn en þeir spurðu mig alltaf um annað fólk,“
sagði hann fyrir dómi.
Hann hefur setið í fangelsi síðan 1994 en hann afplánar lífstíðardóm fyrir nauðgun og morð á mágkonu sinni. Ekki er hægt að sækja hann til saka fyrir Hwaseong-morðin því þau eru fyrnd.
