Að minnsta kosti 59 lík fundust í nokkrum gröfum í Guanajuato-ríki í Mexíkó fyrr í vikunni. Yfirvöld tilkynntu um þetta á miðvikudaginn. Karla Quintana, sem stýrir sérstakri rannsóknarnefnd yfirvalda, sagði að flest líkin virðist vera af ungu fólki, mjög ungu, jafnvel á unglingsaldri.

Hún sagði að 10 til 15 af líkunum virðist vera af konum en það hefur ekki verið staðfest endanlega.

Grafirnar fundust nærri Barrio de San Juan í Salvatierra í suðurhluta ríkisins. Þetta er stærsti líkfundurinn til þessa í Guanajuato. Morðtíðnin í ríkinu hefur verið ein sú hæsta í Mexíkó á síðustu árum vegna átaka eiturlyfjahringa.

Yfirvöldum var bent á hugsanlega staðsetningu grafanna fyrir um tveimur vikum og síðustu níu daga hefur lögreglan unnið að uppgreftri á svæðinu.

Frá því að Felipe Calderon, þáverandi forseti, lýsti yfir stríði gegn eiturlyfjahringjunum árið 2006 hefur ofbeldið í landinu kostað rúmlega 200.000 manns lífið.

Í Guanajuato skráðu yfirvöld 2.250 morð á fyrstu átta mánuðum ársins. Þetta er 25% aukning frá sama tíma á síðasta ári.