Konungbornir finna fyrir heimsfaraldri kórónuveirunnar eins og allir aðrir. Faraldurinn hefur sett mark sitt á árið hjá dönsku konungsfjölskyldunni, til dæmis varð að aflýsa hátíðarhöldum í tilefni af áttræðisafmæli Margrétar Þórhildar II drottningar. Nú hefur verið tilkynnt að nýársfagnaði konungshallarinnar hafi verið aflýst um þessi áramót. Um mörg hundruð ára gamla hefð er að ræða og er þetta aðeins í annað sinn sem nýársfögnuðinum er aflýst.

Allt frá þeim tíma er Friðrik III ríkti, hann ríkti frá 1648 til 1670, hefur hirðin boðið ýmsum embættismönnum og kjörnum fulltrúum til nýársfagnaðar á nýársdag. Ekki er vitað með vissu hversu gömul þessi venja er en sagan segir að á sautjándu öld hafi verið talað um að þetta væri gömul venja og því ekki öruggt að hún hafi hafist á valdatíma Friðriks III.

Þessum nýársfagnaði hefur verið aflýst einu sinni áður en það var 2005 en þá var fagnaðinum aflýst í kjölfar hinnar skelfilegu flóðbylgju sem reið yfir Asíu um jólin 2004 og varð mörg hundruð þúsund manns að bana.

Meðal fastra gesta á nýársfagnaðinum eru ríkisstjórnin, forseti þingsins og starfsmenn konungshallarinnar.