Trump hefur verið með ansi virka og áberandi kosningabaráttu en Biden hefur haldið sig nokkuð til hlés síðustu daga. Trump hefur ferðast á milli ríkja til að halda kosningafundi og hefur þurft að takast á við gagnrýna fréttamenn. Biden hefur hins vegar haldið sig heima í Delaware til að undirbúa sig undir kappræðurnar. Ein af fáum spurningum sem hann hefur svarað á síðustu dögum er hvernig mjólkurhristing hann kýs helst.
„Spurning dagsins til Joe Biden: Ert þú farinn í felur í þessari viku fyrst þú hefur ekki svarað öðru en spurningu um mjólkurhristing?“
skrifaði Jonathan Martin, blaðamaður hjá The New York Times, á Twitter. Aðrir blaða- og fréttamenn hafa tekið undir þessi skrif Martin, þar á meðal Richard Benedetto, fyrrum blaðamaður USA Today í Hvíta húsinu.
Biden hefur verið undir nokkrum þrýstingi að undanförnu frá Repúblikönum vegna ýmissa fullyrðinga um tengsl sonar hans, Hunter, við Úkraínu þar sem spilling er útbreidd. Joe Biden hefur ekki fengið margar spurningar um Hunter og þeim sem hann hefur fengið hefur hann einfaldlega vísað á bug.
Biden hefur mánuðum saman ekki verið svo aðgengilegur fyrir fréttamenn en opinbera ástæðan fyrir því er heimsfaraldur kórónuveirunnar. Benedetto telur þó að ástæðan geti frekar verið að Biden hafi unnið á meðal kjósenda með því að halda sig til hlés.
„Ef ég væri í framboði og hefði séð að ég gæti komist upp með að svara ekki fjölda spurninga, af hverju ætti ég þá ekki að halda því áfram?“
skrifaði hann í athugasemd þar sem hann gagnrýnir fréttamenn fyrir að ganga ekki nægilega hart fram gegn Biden.
