Í 175 ára sögu Scientific American hefur tímaritið aldrei tekið afstöðu í stjórnmálum. En nú hefur þessi sögulega hefð verið rofin í nýjasta tölublaðinu. Þar segir að forsetakosningarnar þann 3. nóvember næstkomandi snúist bókstaflega um líf og dauða.

Samkvæmt frétt The Washington Post er tímaritið elsta tímarit landsins sem hefur komið út án nokkurra hlé á útgáfunni. Í grein í nýjasta tölublaðinu segir að blaðið hafi tekið ákvörðun sem gangi gegn því sem það hefur gert fram að þessu.

„Scientific American hefur aldrei lýst yfir stuðningi við forsetaframbjóðanda í 175 ára sögu sinni. Nú neyðumst við til þess. Þetta er ekki auðvelt fyrir okkur,“

segja ritstjórar blaðsins í blaðinu.

Fyrir fjórum árum sagði blaðið að það óttaðist Donald Trump, þáverandi forsetaframbjóðanda, vegna viðhorfa hans til vísinda en blaðið gekk ekki svo langt að lýsa yfir stuðningi við Hillary Clinton.

Óhæfur

Blaðið segir nú að viðhorf Trump til vísinda og rannsókna á þeim fjórum árum sem hann hefur setið í Hvíta húsinu sé ein aðalástæðan fyrir að blaðið lýsi nú yfir stuðningi við Joe Biden.

„Sorglegasta dæmið er óheiðarleiki hans og ónothæf viðbrögð við COVID-19 faraldrinum sem hefur orðið 190.000 Bandaríkjamönnum að bana,“

segir í grein ritstjóranna.

Ritstjórarnir segja forsetatíð Trump vera „hörmulega“ og benda á endurteknar árásir hans á heilbrigðiskerfið, vísindamenn og náttúruna.

Hörð gagnrýni er sett fram á ráðgjafa Trump og þeir bornir saman við ráðgjafa Biden og bent á að meðal ráðgjafa Trump séu læknar sem trúa á geimverur og læknismeðferðir, sem virka ekki, við veirusýkingum. Læknar sem Trump hefur lýst sem „mjög virtum“ og „frábærum“.

„Af þessum sökum hvetjum við þig til að kjósa Joe Biden sem byggir áætlanir sínar um hvernig á að vernda heilsu okkar, efnahagslífið og umhverfið á staðreyndum.“