Í útvarpsviðtali hjá nýsjálensku stöðinni Magic sagði hann að ríki heims eigi frekar að horfa til Svíþjóðar og viðbragða þar í landi við heimsfaraldrinum en til Nýja-Sjálands þar sem nálgunin var allt önnur. Þar var samfélaginu lokað að stórum hluta í upphafi faraldursins til að hefta útbreiðslu hans og tókst það vel og hafa stjórnvöld þar í landi góða stjórn á útbreiðslu veirunnar.
Nabarro sagðist telja betra að horfa til sænsku leiðarinnar í glímunni við faraldurinn og þannig forðast að loka of stórum hlutum samfélagsins.
„Við sjáum að þannig lokanir, þar sem fólk má ekki fara ferða sinna, koma illa við tekjumöguleika fólks, sérstaklega þeirra fátæku,“
sagði hann og bætti við að hann telji að „Svíþjóð og önnur ríki, sem hefur tekist að halda áfram án umfangsmikilla lokana, geti vísað veginn.“ Hann tók einnig fram að Svíar hafi þó átt í miklum erfiðleikum með að halda smiti frá dvalarheimilum aldraðra og það hafi kostað mörg mannslíf.
Hann sagði að markmiðið sé að fólk læri að lifa með veirunni þar til bóluefni komi fram. Þessu sé hægt að ná með því að fólk taki sjálft ábyrgð á hegðun sinni til að draga úr líkunum á smiti.
