Sky skýrir frá þessu. Fram kemur að eyru hafi verið skorin af, augun tekin úr, kynfærin skorin, maginn skorinn upp og allt blóð tæmt úr dýrunum. Ekkert kjöt hefur verið tekið.
Ekki er talið útilokað að sum þessara illvirkja tengist helgisiðum óþekkts safnaðar. Á samfélagsmiðlum ganga kenningar um að hér sé um einhverskonar „áskoranir“ að ræða eða að hermikrákur séu að verki.
Í flestum tilvikunum hefur eyra, yfirleitt það hægra, verið skorið af dýrunum. Það er eins og nautabanar gera þegar þeir hafa lagt naut að velli.
Tilkynnt hefur verið um mál af þessu tagi allt frá fjalllendinu í Jura í austurhluta landsins til Atlantshafsstrandarinnar í vestri. Margar tilkynningar hafa borist nú í sumar.
Því hefur verið velt upp hvort fólk, sem ekki hefur þekkingu á líffræði hrossa, geti gert þetta og af hverjum hrossin hafi ekki flúið. Aude Giraudet, dýralæknir, sagði að óttaslegið hross í haga láti ekki ná sér.
„Hross, sem treystir fólki, það kemur. Því finnst eðlilegt að reipi sé sett um háls þess. Ég er ekki viss um að það þurfi mikla þekkingu á hrossum,“
sagði hún.
Á mánudag í síðustu viku kom Nicolas Demajean að tveimur mönnum sem voru að ráðast á hesta hans í Bourgogne-Franche-Comte. Hann skarst á handlegg í átökum við annan manninn, sem var vopnaður hníf, á meðan hinn skar tvo smáhesta. Þeir eru á batavegi. Mennirnir flúðu síðan af vettvangi í bíl.
