Fyrir fjórum árum hringdi Stephanie Smith, 29 ára, hágrátandi í neyðarlínuna í Athens í Alabama í Bandaríkjunum og sagðist hafa fundið fjögurra ára dóttur sína, Zadie, líflausa á milli rúms og veggs. Hún var strax flutt á sjúkrahús en þremur dögum síðar var hún úrskurðuð látin.

Krufning leiddi ekki í ljós hvernig Zadie hafði látist og engan grunaði að neitt saknæmt hefði átt sér stað.

Skömmu eftir andlátið byrjaði Stephanie að blogga um dóttur sína og andlátið.

„Ég vildi óska að þú hefði tekið mig með þér. Ég vil ekki vera hér án þín. Ég vil það ekki. Ég elska þig að eilífu, ástin mín.“

Skrifaði hún á Instagram.

„Það sem kom fyrir Z var undarlegt. Enn undarlegra að fólk sakar mig um að hafa myrt hana. Já, þú ert að lesa rétt. Svo örvæntingarfull erum við eftir að fá svör. Ég fæ ekki svör. Andlát hennar verður ráðgáta og ég gat ekki séð það fyrir eða komið í veg fyrir það og ég hefði ekki getað bjargað henni.“

Þann 13. apríl 2017 fór Stephanie á lögreglustöð og sagði lögreglunni hvað hafði komið fyrir Zadie. People skýrir frá þessu.

Hún játaði að hafa kæft hana með púða. Hún sagðist hafa hætt að taka lyf, sem hún tók við andlegum veikindum, áður en hún myrti dóttur sína. Hún sagðist hafa misst minnið og hafi ekki vitað að hún var að myrða dóttur sína. Það hafi ekki verið fyrr en að morðinu loknu sem hún áttaði sig á hvað hún hafði gert.

„Hún sagði okkur að hún glímdi við andleg veikindi og að þegar hún myrti Zadie hafi hún ekki verið búin að taka lyfin sín og hafi ekki verið með réttu ráði.“

Sagði Floyd Johnson, lögreglustjóri, á fréttamannafundi 2017.

Réttarhöldum yfir Stephanie lauk í síðustu viku og var hún dæmd í lífstíðarfangelsi. Hún samdi við ákæruvaldið um þessa niðurstöðu til að komast hjá því að verða dæmd til dauða.