Það eru staðbundnir faraldrar á jaðarsvæðum í landinu sem valda mikilli fjölgun smita þessa dagana. Á þessum svæðum er heilbrigðiskerfið veikt og á erfitt með að takast á við faraldurinn. Smit hafa borist til lítilla bæja og í dreifbýli.
Fyrsta tilfellið í landinu greindist þann 30. janúar að sögn BBC. Þann 17. júlí voru staðfest smit orðin ein milljón, 12 dögum síðar voru þau ein og hálf milljón og níu dögum síðar tvær milljónir. Aðeins í Bandaríkjunum og Brasilíu hafa fleiri smit greinst.
En þrátt fyrir að talan sé há þá er hlutfall smitaðra ekki svo hátt ef miðað er við íbúafjölda eða tæplega 1.500 á hverja milljón landsmanna ef miðað er við opinberar tölur. En það er rétt að hafa þann fyrirvara á að margir sérfræðingar efast um að opinberu tölurnar séu alveg réttar og telja að fjöldi smitaðra geti verið miklu meiri.
Byrjað er að aflétta sumum af þeim hömlum sem voru settar fyrir mörgum vikum til að hefta útbreiðslu faraldursins. Þetta er gert til að koma hjólum efnahagslífsins aftur í gang. En það er einmitt í kjölfar þessara aðgerða sem smitum hefur fjölgað. En lífið er að færast í fyrra horf í höfuðborginni Nýju-Delí og milljónaborginni Mumbai en þar er talið að faraldurinn hafi náð hámarki. Nokkurra vikna gömul rannsókn sýndi að allt að fjórðungur hinna 20 milljón íbúa Mumbai gæti hafa smitast af veirunni. Önnur rannsókn sýndi að rúmlega helmingur íbúa í fátækustu hverfum borgarinnar hafi nú þegar smitast af veirunni.
