Spurningin um stöðu okkar í alheiminum hefur lengi leitað á fólk en eins og er vitum við ekki annað en að jörðin okkar sé eini staðurinn í alheiminum þar sem líf er að finna. En margir vísindamenn telja að við færumst sífellt nær því að fá svar við því hvort við séu virkilega ein.
En það er fleira en leit að lífi sem þetta verkefni snýst um. Gera á tilraunir með hvort hægt sé að framleiða súrefni á Mars fyrir geimfara sem verða væntanlega sendir þangað innan ekki svo margra ára. Um borð í geimfarinu verða meðal annars lítil þyrla og sjálfstýrt vélmenni.
Þessi geimferð er hluti af mörgum verkefnum á Mars síðan fyrstu myndirnar voru teknar af yfirborði Mars 1964. Síðan þá hafa mörg geimför verið send til plánetunnar sem er sú pláneta sem við höfum rannsakað mest, þar á meðal að ummerkjum um líf. Vélmenni, eða öllu heldur Marsbílar, hafa verið sendir til plánetunnar og þeir hafa gert merkar uppgötvanir. Meðal annars geta vísindamenn með mikilli vissu sagt að fyrir milljörðum ára hafi verið mikið af fljótandi vatni á Mars.
Nýi Marsbíllinn, Perseverance, á að einbeita sér að leit að ummerkjum um líf á plánetunni, hvort sem það er útdautt eða enn til staðar. Perseverance er í raun akandi tilraunastofa með fjölda háþróaðra myndavéla. Þær verða notaðar til að greina efnafræðilega samsetningu á yfirborðinu og geta séð hugsanleg merki um steingert líffræðilegt efni í bergi. Ekki er talið útilokað að örverur þrífist á Mars, á yfirborðinu eða undir því, og munu rannsóknir einnig beinast að því.
Evrópska geimferðastofnunin ESA sendir geimfar til Mars 2022 en í þeirri ferð á að bora tvo metra niður í yfirborðið. Ekki er talið útilokað að þá finnist líf því vitað er að vatn, sem er bundið við málma, er þar að finna.
En leitin að lífi er ekki eina verkefni næstu geimferðar því í henni verður prófað hvort hægt er að búa til súrefni úr innihaldi andrúmsloftsins á Mars en CO2 er aðaluppistaðan í því. Það kann að virðast sem svo að langt sé í að menn verði sendir til Mars en svo er ekki að margra mati.
Milljarðamæringurinn Elon Musk, maðurinn á bak við SpaceX, hefur mikinn áhuga á að senda menn til Mars og koma þar upp varanlegri búsetu. Hann vinnur hörðum höndum að þessu en ástæðan fyrir áhuga hans á þessu er að það sé ekki nóg fyrir okkur sem tegund að búa á einni plánetu ef við viljum lifa af. Stephen Hawking heitinn, sem var heimsfrægur eðlisfræðingur, var sömu skoðunar og sagði að mannkynið neyðist til að koma sér fyrir á öðrum plánetum til að tryggja tilvist sína.
NASA vinnur einnig að undirbúningi mannaðrar geimferðar til Mars. Þar á bæ er það geimfarið Orion sem á að flytja menn til plánetunnar. Bandarísk stjórnvöld hafa gefið út að senda eigi menn til Mars á fjórða áratug aldarinnar og hann er nú ekki svo langt undan. Svo er spurningin hvort aðrir verði fyrri til eða hvort undirbúningur þeirra undir slíka ferð þrýsti svo á NASA að stofnunin flýti verkefninu.
