Upp komst um söfnuðinn um helgina þegar ítalska lögreglan lét til skara skríða gegn honum eftir tveggja ára rannsókn á málinu. Á sunnudaginn var hinn aldni safnaðarleiðtogi handtekinn. Lögreglan segir að hann hafi markvisst leitað að ungum stúlkum og hafi komist í samband við þær í gegnum ýmis fyrirtæki og dansskóla í Novara í norðurhluta landsins.
Konurnar hafa sagt lögreglunni að maðurinn hafi notað jurtir og lyf til lokka þær til sín.
„Hann velur hvaða stúlkur eiga að skemmta honum. Við köllum hann „hann“ eða „lækninn“ því við megum ekki segja nafn hans.“
Sagði ein kvennanna lögreglunni.
Lögreglan telur að söfnuðurinn hafi starfað í um 30 ár og að konurnar hafi verið heilaþvegnar og innrættar á kerfisbundinn hátt. Þær voru beðnar um að slíta öllum tengslum við fjölskyldur sínar og vini og hafa sem allra minnst samskipti við umheiminn.
Lögreglan veit ekki enn hversu umfangsmikil starfsemin var eða hversu margar konur hafa mátt þola kynferðisofbeldi af hálfu mannsins. Fórnarlömbin segja að maðurinn hafi sagt þeim að kynferðisofbeldið myndi „kveikja neista innra með þeim“.
Það var ábending frá fyrrum félaga í söfnuðinum sem kom lögreglunni á slóð safnaðarins. Auk forsprakkans eru fleiri grunaðir í málinu en lögreglan vill ekki upplýsa hversu margir það eru.
