Sjötugur maður, sem var nærri því að deyja af völdum COVID-19, hefur fengið reikning upp á 1,1 milljón dollara, sem svarar til um 150 milljóna íslenskra króna, vegna sjúkrahúskostnaðar. Hann var lagður inn á sjúkrahús í Seattle í byrjun mars og var þar í 62 daga. Um tíma var hann svo hætt kominn að eiginkona hans og börn kvöddu hann símleiðis. En hann jafnaði sig.

Samkvæmt frétt Seattle Times þá hefur maðurinn nú fengið reikning, sem er 181 síða, þar sem kemur fram að lega á gjörgæsludeild kosti 9.700 dollara á sólarhring. Það kostaði 409.000 dollara að sótthreinsa herbergið hans í 42 daga og í þá tvo daga sem hann var við það að deyja kostaði umönnun hans 100.000 dollara.

Seattle Times segir að vegna þess að maður er með sjúkratrygginguna Medicare þá þurfi hann væntanlega ekki að greiða alla upphæðina sjálfur.

„Það kostaði rúmlega milljón dollara að bjarga lífi mínu og ég segi að þeim peningum sé vel varið. En ég veit að ég er kannski sá eini sem er þeirrar skoðunar.“

Hefur blaðið eftir manninum.