Aftonbladet skýrir frá þessu og vitnar í heimildarmenn innan ríkisstjórnarinnar. Palme var myrtur að kvöldlagi í febrúar 1986 þegar hann var að koma úr kvikmyndahúsi.
Krister Petterson, saksóknari, hefur áður látið hafa eftir sér að hann væri bjartsýnn á að hægt væri að upplýsa málið og skýra frá hver myrti Palme. Aftonbladet hefur áður skýrt frá því að morðinginn sé látinn.
Þrátt fyrir að morðinginn sé látinn er talið að ákæruvaldið hafi aflað nægilegra sönnunargagna til að gefa út ákæru og að réttarhöld fari fram í framhaldi af því. NTB skýrir frá því.
The Guardian segir að sænskir lögreglumenn hafi fundað með fulltrúum suður-afrísku leyniþjónustunnar í Pretoríu í Suður-Afríku um miðjan mars og hafi þá fengið afhent gögn sem skipta máli fyrir rannsóknina. Ekki er vitað hvort þau innihalda ný sönnunargögn.
Ein af kenningunum, sem mest hafa verið ræddar undanfarin misseri, um morðið er sú þar sem hinn svokallaði Skandiamaður kemur við sögu. Það var maður sem starfaði hjá tryggingafélaginu Skandia og var staddur nærri morðvettvanginum. Hann var síðar yfirheyrður sem vitni en grunur féll ekki á hann á þeim tíma. Hann er sagður hafa haft aðgang að byssu sömu gerðar og Palme var skotinn með. Skandiamaðurinn er sagður hafa hatað Palme eins og pestina. Hann lést árið 2000.
