„Þetta byrjaði fyrir níu árum. Allt í einu birtist pizzasendill og rétti mér stafla af pizzum. En ég hafði ekki pantað neitt.“
Sagði hann í samtali við Het Laatste Nieuws.
Hann hélt í fyrstu að um mistök væri að ræða, heimilsföng hefðu ruglast en áfram héldu pizzur, kebab, pítur og annar matur að streyma heim til hans án þess að hann hefði pantað matinn.
„Þetta getur verið á virkum degi eða um helgar og á hvaða tíma dags sem er. Pantanirnar koma frá veitingastöðum í Turnhout en líka frá nálægum svæðum. Ég hef meira að segja fengið sendingar klukkan tvö á nóttunni.“
Sagði hinn óhamingjusami og þreytti Van Landeghem.
„Ég sef ekki lengur. Ég byrja að skjálfa í hvert sinn sem ég heyri í skellinöðru í götunni. Ég óttast að einhver sé að koma með heita pizzu enn einu sinni.“
Hann sagði að á einum degi í janúar á síðasta ári hafi tíu pizzasendlar komið heim til hans með samtals 14 pizzur.
„Ég hef alltaf neitað að taka við þessum pöntunum svo ég hef aldrei borgað fyrir þetta. Þetta kostar veitingastaðina peninga og þeir þurfa að henda matnum. Daginn sem sendlarnir tíu komu reiknaði ég út að þetta voru pizzur fyrir 450 evrur.“
En hann er ekki einn um að fá svona sendingar.
„Vinur minn, sem býr í Herenthout, gengur í gegnum nákvæmlega það sama og ég. Hann hefur fengið pizzur, sem hann pantaði ekki, í níu ár. Stundum fáum við báðir sendingar sama daginn.“
Sagði Van Landeghem sem telur líklegt að einhver sem þeir þekkja báðir standi á bak við þetta.
Hann hefur kært málið nokkrum sinnum til lögreglunnar en hefur enga hugmynd um hver stendur á bak við þetta.
„Ég þoli þetta ekki lengur.“
