Franska flugfélagið Air France-KLM tilkynnti í síðustu viku að það taki nú allar níu Airbus A380 flugvélar sínar úr notkun fyrir fullt og allt. Ætlunin var að nota þær aðeins áfram en hætta notkun þeirra fyrir árslok 2022 til að gera flugflotann samkeppnishæfari og draga úr mengun af hans völdum. En vegna áhrifa heimsfaraldurs kórónuveirunnar hefur þessum fyrirætlunun nú verið flýtt.

Í fréttatilkynningu frá félaginu kemur fram að ný kynslóð flugvéla, til dæmis Airbus A350 og Boeing 787, muni taka við hlutverki Airbus A380 sem er stærsta farþegaflugvél heims. Air France á fimm af vélunum níu en er með hinar fjórar á leigu.

Heimsfaraldurinn hefur haft mikil áhrif á rekstur flugfélagsins. Á fyrsta ársfjórðungi tapaði það sem nemur um 270 milljörðum íslenskra króna og farþegum fækkaði um fimmtung, voru 18,1 milljón.

Félagið væntir þess að geta haldið uppi 20% af fyrirhuguðu flugi á þriðja ársfjórðungi en á fjórða ársfjórðungi verði hlutfallið komið í 60%. Á næsta ári er reiknað með að hlutafallið verði um 80% af því sem reiknað hafði verið með.