Vegna heimsfaraldurs kórónuveiru er alvarlegur lyfjaskortur í Svíþjóð. Sænsk yfirvöld hafa því beðið nágranna sína í Noregi um aðstoð og hafa Norðmenn orðið við því og ætla að senda umbeðið lyf til Svíþjóðar.

Samkvæmt frétt Dagbladet setti Lena Hallengren, heilbrigðisráðherra Svíþjóðar, sig í samband við kollega sinn í Noregi, Bent Høie, í síðustu viku og spurði hvort Norðmenn gætu sent Svíum propofol, sem er svæfingalyf, en lyfið er notað við meðhöndlun COVID-19 sjúklinga.

„Ég ræddi við norska heilbrigðisráðherrann og skýrði honum frá stöðu mála í Svíþjóð. Við urðum sammála um að leysa málið eins vel og við gætum.“

Segir í tilkynningu frá Hallengren.

Høie sagði í samtali við Dagbladet að í kjölfar samtals hans við Hallengren hafi norska lyfjaeftirlitið heimilað að propofol yrði sent til Svíþjóðar og ætla Norðmenn að senda 2.600 skammta af lyfinu til granna sinna.

Samkvæmt norrænum samstarfssamningi um heilbrigðismál skuldbinda Norðurlöndin sig til að hjálpa hvert öðru ef þau geta.

Staðan varðandi COVID-19 er gjörólík í Noregi og Svíþjóð. Í Noregi hafa 228 látist af völdum sjúkdómsins og um 8.000 smit hafa verið staðfest. Í Svíþjóð hafa rúmlega 3.300 látist og rúmlega 27.000 smit hafa verið staðfest.

Svíum skortir propofol vegna hins mikla fjölda smitaðra en í Noregi er birgðastaðan góð.