Japanski bílaframleiðandinn Mazda er eins og mörg önnur fyrirtæki í vanda vegna heimsfaraldurs kórónuveiru. Fyrirtækið hefur neyðst til að loka verksmiðjum tímabundið og bílasala hefur dregist mikið saman. Fyrirtækið hefur nú sótt um að fá um 300 milljarða jena, sem svara til um 400 milljarða íslenskra króna, að láni hjá þremur stærstu bönkum Japans.

Reuters segir að lánin eigi að hjálpa fyrirtækinu að komast í gegnum heimsfaraldurinn. Fram kemur að bankarnir hafi nú þegar samþykkt að lengja í lánum fyrirtækisins og reiknað er með að aðrir lánveitendur muni einnig gera það.

Samdráttur hafði orðið í sölu Mazdabifreiða áður en heimsfaraldurinn skall á.

Aðrir bílaframleiðendur eiga einnig í vök að verjast vegna heimsfaraldursins. Tesla hefur til dæmis sótt um lán upp á sem nemur um 80 milljörðum íslenskra króna til að tryggja starfsemi sína í Shanghai í Kína.