„Ég heyrði skyndilega öskur. Skelfilegt öskur. Ég hafði aldrei áður heyrt svona öskur. Ég hljóp upp.“
Sagði hún fyrir dómi á miðvikudaginn. Þegar hún kom inn í barnaherbergi á hæðinni sá hún eiginmanninn standa í keng yfir syninum með hendur á hálsi hans. Það var enginn efi í huga hennar, maðurinn sem hún hafði deilt lífinu með árum saman var að myrða son þeirra.
Málið hefur vakið mikinn óhug í Noregi. Faðirinn hefur frá upphafi játað að hafa myrt Oscar og að hafa undirbúið morðið. Hann hafði meðal annars séð til þess að eiginkona hans gæti ekki sótt aðstoð.
Þegar hún kom inn í barnaherbergið greip hún í manninn og reyndi að rífa hann frá Oscari en maðurinn yfirbugaði hana og bar inn í næsta herbergi þar sem hann læsti hana inni.
„Hann sagði: „Ég fyrirfer mér og drep Oscar.“ Síðan læsti hann dyrunum.“
Sagði móðirin fyrir dómi.
Maðurinn hafði áður skýrt dómnum frá því að daginn fyrir morðið hafi hann gengið þannig frá gluggum, svaladyrum og brunastiga að konan hans kæmist ekki út til að sækja hjálp.
Oscar hlaut alvarlega áverka við atlögu föður síns og lést af völdum þeirra nokkrum vikum síðar. Föðurnum tókst ekki að taka eigið líf og hringdi sjálfur í lögregluna.
Ástæðan fyrir morðinu er að sögn föðursins að Oscar hafði daginn áður sagt móður sinni að faðir hans hefði misnotað hann kynferðislega árum saman. Þau voru kjörforeldrar hans en Oscar var frá Kólumbíu en kom til þeirra þegar hann var átján mánaða. Hann hafði árum saman glímt við miklar tilfinningasveiflur og reiði.
Það var ekki fyrr en hann sagði móður sinni frá kynferðisofbeldinu sem hún skildi orsökina fyrir tilfinningasveiflunum og reiðinni.
„Áður en við ættleiddum hann vissum við að börn, sem hafa átt erfitt í upphafi lífsins, geta átt við meiri erfiðleika að etja síðar. Hann var fyrirburi og var með fráhvarfseinkenni þegar hann fæddist og lífið var erfitt í byrjun. Hann var tekinn frá móður sinni snemma og við vissum að það gæti valdið skaða.“
Sagði móðirin fyrir dómi og bætti við:
„Það sem sækir mest á mig er að hann, sem var minn nánasti árum saman, hafi getað gert barninu okkar þetta.“
Saksóknari krefst 21 árs fangelsis yfir manninum.
