Suður-kóreska fréttastofan Yonhap segir hinsvegar að leiðtoginn sé ekki alvarlega veikur og hefur þær upplýsingar frá suður-kóreska forsetaembættinu. Áður hafði suður-kóreska heimasíðan Daily NK sagt að Kim Jong-un fengi nú meðhöndlun vegna hjartavandamála. Fram kom að einræðisherrann hefði gengist undir aðgerð fyrr í mánuðinum og af þeim sökum væri ástand hans nú alvarlegt.
Í síðustu viku veltu fjölmiðlar og sérfræðingar í málefnum Norður-Kóreu því fyrir sér af hverju Kim Jong-un var ekki viðstaddur hátíðarhöld í tilefni af fæðingardegi afa síns, Kim Il Sung, sem stofnaði Norður-Kóreu 1948. Þá fengust engar upplýsingar um málið en nú virðast einhverjar upplýsingar hafa lekið út frá þessu harðlokaða einræðisríki.
Daily NK er heimasíða sem er rekin af fólki sem hefur flúið frá Norður-Kóreu. Á síðunni er haft eftir ónafngreindum heimildamönnum að Kim Jong-un dvelji nú á sumarleyfisstað nærri Kumgang fjalli og hafi verið síðan aðgerðin var gerð á honum þann 12. apríl. Fram kemur að heilsu hans hafi hrakað á undanförnum mánuðum vegna mikilla reykinga, ofþyngdar og mikillar vinnu. Hann er sagður hafa sést síðast á almannafæri þann 11. apríl þegar hann mætti á fund í stjórnmálanefnd Verkamannaflokksins sem að nafnin til fer með völdin í landinu.
Mörgum eldflaugum var skotið á loft frá Norður-Kóreu í síðustu viku. Kim Jong-un er vanur að nota eldflaugaskot til að auglýsa sig en ekki í síðustu viku og raunar skýrði ríkisfréttastofa landsins, og eina fréttastofan þar í landi, ekki einu sinni frá eldflaugaskotunum.
